سفرة اليوم ال 26 من مطبخ طنط زيزي

 

سفرة اليوم ال 26 من مطبخ طنط زيزي

سفرة اليوم ال 26 من مطبخ طنط زيزي

على سفرة النهارده هيكون موجود عصير قمر الدين وسلطة الطحينة بالبنجر وشوربة المشروم بالكريمة وكفتة الفراخ المشوية وسلطة فواكه وعلى السحور هنقدّم لك باذنجان بالخضراوات..

عصير قمر الدين

عصير قمر الدين

عصير قمر الدين

المقادير:
½ لفة قمر الدين
2 كوب سكر
6 كوب ماء دافي

الطريقة:
1- انقعي قمر الدين في الماء الدافي، وسيبيه لغاية ما يدوب، وبعد كده قلّبيه كويس، وصفّيه وضيفي له السكر، وشيليه في الثلاجة لغاية ما يبرد وبعد كده صبّيه في الكاسات مع مكعبات الثلج.

****************

سلطة الطحينة بالبنجر

سلطة الطحينة بالبنجر

سلطة الطحينة بالبنجر

المقادير:
¼ كوب طحينة
3 ثمرة بنجر صغيرة
¼ كوب عصير ليمون
3 ملعقة كبيرة زيت زيتون
½ كوب بقدونس مفروم
2 فص ثوم مفروم
ملح وفلفل

الطريقة:
1- اغسلي البنجر كويس جدا، وقطّعيه مكعبات واسلقيه في كمية ميه مناسبة لغاية ما يستوي تماما، وبعد كده ارفعيه من على النار وسيبيه يبرد.

2- اضربي البنجر في الخلاط، وضيفي معاه الطحينة والثوم والملح والفلفل والزيت وعصير الليمون.

3-اغرفي السلطة في طبق التقديم، وزيّنيها بالبقدونس المفروم وقدّميها.

****************

شوربة المشروم

شوربة المشروم

شوربة المشروم

المقادير:
علبة مشروم
كوب كريمة
مكعب مرقة دجاج
بصلة صغيرة مفرومة
2 ملعقة كبيرة دقيق
2 ملعقة كبيرة زبدة
ملح وفلفل أسود
4 كوب ميه

الطريقة:
1- شوّحي البصل في الزبدة على النار لمدة دقيقتين، وبعد كده ضيفي عليه نصف كمية المشروم، وقلّبيهم مع بعض لمدة 5 دقايق، وبعد كده حطّي مرقة الدجاج والدقيق والملح والفلفل والميه، وسيبيهم يغلووا على النار لمدة 10 دقائق، وبعد كده ارفعي الشوربة من على النار وسيبيها تبرد.

2- اضربي الشوربة في الخلاط لغاية ما تتجانس تماما، وبعد كده حطّيها مرة تانية على النار، وضيفي عليها باقي كمية المشروم ، وقلّبيهم مع بعض على النار لمدة 5 دقائق وبعد كده ضيفي الكريمة، وقلّبيهم مع بعض وبعد كده اطفي عليها واغرفيها في أطباق التقديم وقدّميها سخنة.

****************

كفتة الفراخ المشوية

كفتة الفراخ المشوية

كفتة الفراخ المشوية

المقادير:
كيلو صدور فراخ مخلية ومفرومة
ثمرة فلفل أخضر مقطّع قطع صغيرة
½ ملعقة كبيرة توابل فراخ مطحونة
2 ملعقة كبيرة بقدونس مفروم
ملعقة صغيرة زنجبيل مفروم
ملعقة كبيرة ثوم مفروم
½ ملعقة كبيرة بابريكا
½ ملعقة كبيرة ملح

الطريقة:
1- اخلطي كل المكونات مع بعض في طبق كبير، وبعد كده صبّعي الكفتة في أسياخ خشبية وسيبيها في الثلاجة لمدة ساعة.

2- حضّري الشواية أو طاسة تيفال فيها ملعقة زيت صغيرة وسخّنيها وحطي فيها أسياخ الكفتة لغاية ما تستوي وتكتسب لون الشوي من كل الجوانب، وبعد كده رصّيها في طبق التقديم وزيّنيها الجزر والطماطم المقطّعة، وقدّميها سخنة.

****************

سلطة فواكه

سلطة فواكه

سلطة فواكه

المقادير:
½ كيلو فراولة مقطّعة مكعبات
4 ثمرة خوخ مقطّعة مكعبات
2 ثمرة تفاح مقطّعة مكعبات
ثمرة كانتلوب مقطّعة مكعبات
3 ثمرة موز مقطّع شرائح
علبة آيس كريم فانيليا
عصير 2 ليمونة
سكر

الطريقة:
1- اخلطي الفاكهة كلها في طبق كبير وحطّي عليها عصير الليمون والسكر، وقلّبيهم كويس مع بعض، وبعد كده اغرفيها في أطباق التقديم، وزيّنيها بالآيس كريم.

****************

للسحور.. باذنجان بالخضراوات

للسحور.. باذنجان بالخضراوات

للسحور.. باذنجان بالخضراوات

المقادير:
ثمرة باذنجان متوسطة الحجم
ثمرة فلفل أخضر مقطّع مكعبات
½ كوب مشروم مقطّع مكعبات
2 ثمرة طماطم مقطّعة مكعبات
¼ ملعقة صغيرة كمون
ملعقة صغيرة ملح
عصير ليمونة
زيت زيتون

الطريقة:
1- اغسلي الباذنجان كويس وقطّعيه مكعبات ورشّي علية ملح وسيبيه شويه ينزل الميه اللي فيه وبعد كده اشطفيه من الملح.

2- ادهني صينية صغيرة بملعقة زيت زيتون، وحطّي فيها الباذنجان وادهنيه من فوق الوش بطبقة خفيفة من زيت الزيتون، ودخّليه الفرن وسيبيه لغاية ما يستوي.

3- طلّعي الباذنجان من الفرن وحطّي عليه باقي المكونات وقدّميه.

وبكده خلصت عزومة النهارده..
مستنيين تجرّبي وتقولي لنا إيه رأيك..

 

الكلمات الدليلية :| | | |

مقالات متعلقة