سفرة اليوم ال25 من رمضان

 

كل يوم عزومة كاملة من العصير للسحور

كل يوم عزومة كاملة من العصير للسحور

على سفرة النهارده هيكون موجود سموثي الفراولة وسلطة الزبادي بالخيار وشوربة لسان العصفور بالكبد والقوانص وأرز بالكبد والقوانص وأم علي، وعلى السحور هنقدّم لك بطاطس بانيه.

سموثي الفراولة

سموثي الفراولة
المقادير:
2 كوب فراولة
ثمرة موز متوسطة
كوب عصير برتقال
½ كوب ثلج
كوب زبادي
سكر

الطريقة:
اضربي المكونات كلها في الخلاط، وبعد كده صبّيها في الكاسات وقدّميها.

***************

سلطة الزبادي والخيار

سلطة الزبادي والخيار
المقادير:
2 كوب زبادي
2 ثمرة خيار مقطّعة مكعبات صغيرة
ملعقة كبيرة عصير ليمون
ملعقة كبيرة نعناع مفروم
ملح

الطريقة:
1- اخفقي الزبادي لحد ما يبقى عامل زي الكريمة.

2- ضيفي الخيار والملح والليمون والنعناع على الزبادي وقلّبيهم كويس، واستمتعي بسلطة خفيفة وصحية.

***************

شوربة لسان العصفور بالكبد والقوانص

شوربة لسان العصفور بالكبد والقوانص
المقادير:
½ كوب لسان عصفور
¼ كيلو كبد وقوانص مقطّعة
ملعقة كبيرة صلصة طماطم
2 ملعقة كبيرة زيت نباتي
بصلة متوسطة مفرومة
مكعب مرقة دجاج
3 فص حبهان
3 كوب ماء
ملح وفلفل

الطريقة:
1- شوحي البصلة فى الزيت لحد ما تبدأ تصفرّ، بعدين ضيفي عليها اللسان عصفور وحمّريهم مع بعض.

2- اغسلى الكبد والقوانص وصفّيها كويس وبعدين ضيفيهم على لسان عصفور والبصل، واستمرى في التقليب لحد ما تبدأ تدخل في السوى.

3- ضيفي مكعب مرقة الدجاج والصلصة وقلّبيهم كويس مع الخليط، وبعدين ضيفي الميه والحبهان والملح والفلفل، وسيبيهم علي النار لمدة 15 دقيقة، وبكده تبقي عملتي شوربة لسان العصفور بالكبد والقوانص.

***************

أرز بالكبد والقوانص

أرز بالكبد والقوانص
المقادير:
3 كوب أرز مغسول ومصفّى
كيلو كبد وقوانص مقطّعة
2 بصلة كبيرة مفرومة
3 أعواد قرفة خشب
2 ملعقة كبيرة زبدة
ملعقة كبيرة كركم
فص ثوم مفروم
ملح وفلفل
بهارات

الطريقة:
1- في طاسة كبيرة؛ شوّحي نصف كمية البصل في ملعقة زبدة لمدة دقيقتين، وبعدين ضيفي عليها القوانص وشوّحيها شوية على النار، وبعد كده ضيفي الكبدة، وقلّبيهم مع بعض لحد ما ينزّلوا الميه اللي فيهم، وبعدين ضيفي عليهم نصف كوب ميه وتبّليهم بالملح والفلفل والبهارات، وسيبيهم على النار لمدة 15 دقيقة أو لغاية ما تتأكدي إنهم استووا.

2- في حلة منفصلة؛ شوّحي الثوم وباقي كمية البصل في ملعقة زبدة لغاية ما يدبلوا، وبعدين ضيفي عليهم الأرز وقلّبيهم كويس مع بعض، وبعدين ضيفي عليهم البهارات والكركم والقرفة، وقلّبيهم كويس، وبعد كده ضيفي عليهم الميه بحيث تغطّي الأرز، وسيبيه على نار عالية لحد ما الميه تغلي، وبعد كده قللي درجة الحرارة وسيبي الأرز على نار هادية لغاية ما الأرز يبدأ يتشرّب.

3- قبل ما الأرز يستوي ضيفي عليه نصف كمية الكبد والقوانص وقلّبيهم كويس مع بعض، وبعد كده ارفعي الحلة من على النار.

4- قدّمي باقي الكبد والقوانص في طبق منفصل، واستخدمي القوالب في تقديم الأرز.

***************

أم على

أم على
المقادير:
باكت جلاش
¼ كوب زبيب
¼ كوب لوز مفروم
¼ كوب فستق مفروم
¼ كوب جوز هند
½ كيلو لبن مُحلى
كوب قشطة
فانيليا

الطريقة:
1- هاتي باكت الجلاش وافتحيه وقطّعي نصف القالب بالسكينة لشرائح رفيعة جدا من غير ما تفرديه، وشيلي باقي الجلاش في الفريزر علشان تستخدميه مرة تانية.

2- فكّكي شرائح الجلاش اللي قطّعتيه من بعضها، وبعد كده في الزيت لغاية ما يبقى لونها ذهبي، وبعد كده طلّعيها على المناديل الورقية علشان تتشرّب الزيت اللي فيها.

3- اخلطي الجلاش مع الزبيب، والفستق، واللوز، وجوز الهند مع بعض في الطاجن أو الصينية اللي هتعملي فيها، وبعد كده ضيفي عليهم اللبن شوية بشوية لحد ما الخليط يتشرّب.

4- افردي القشطة على الوش، وبعدين حطّيهم في الفرن لمدة 10 : 20 دقيقة، أو لغاية ما وشها يبقى لونه ذهبي محمرّ، وبعد كده طلّعيها وقدّميها سخنة.

***************

للسحور.. بطاطس بانيه

للسحور.. بطاطس بانيه
المقادير:
½ كيلو بطاطس مسلوقة
كوب بقدونس مفروم
2 بيضة متوسطة
كوب بقسماط
زيت للقلي
ملح وفلفل
كمون

الطريقة:
1- اهرسي البطاطس كويس وتبّليها بالملح والفلفل والكمون.

2- ضيفي عليها البيض والبقدونس وقلّبيهم كويس.

3- خدي كميات صغيرة من البطاطس واعملي بيهم أقراص زي الطعمية.

4- قلّبي أقراص البطاطس في البقسماط كويس بحيث يغطّيها من كل الجوانب، وبعدين اقليهم في زيت ساخن غزير لحد ما يبقى لونهم ذهبي، وبعد كده طلّعيهم على مناديل ورقية علشان تشرب الزيت وقدّميهم مع سلطة خضراء.

وبكده خلصت عزومة النهارده..
مستنيين تجرّبي وتقولي لنا إيه رأيك..
واستنينا بكره إن شاء الله مع عزومة جديدة من عزومات ” طنط زيزي ” اللذيذة..

الكلمات الدليلية :| | | |

مقالات متعلقة