سفرة اليوم 27 من رمضان

 

سفرة اليوم 27 من رمضان

سفرة اليوم 27 من رمضان

على سفرة النهارده هايكون موجود عصير التمر هندي وسلطة وشوربة على الطريقة التركية والطبق الرئيسي هيكون كباب تركي والحلو هو بودنج الفراولة، وعلى السحور بنقدّم لك طبق جبنة بالطماطم..

تمر هندي

تمر هندي

تمر هندي

المقادير:
قالب تمر هندي
8 كوب ميه
كوب سكر
ملعقة صغيرة ماء ورد

الطريقة:
1- انقعي قالب التمر هندي في 4 أكواب ميه لمدة 4 ساعات على الأقل وممكن تسيبيه لمدة ليلة كاملة.

2- صفّي التمر بمصفاة رفيعة، وحطّي السائل في إناء زجاجي.

3- بعد كده خدي بواقي التمر اللي هتتبقى في المصفاة، وانقعيه مرة تانية في باقي كمية الميه اللي عندك وقلّبيه كويس، وبعد كده صفّيه مرة تانية على السائل اللي حصلتي عليه في الخطوة اللي فاتت.

4- بعد كده ضيفي السكر وماء الورد على التمر هندي، وضيفي عليه كمية كبيرة من الثلج وسيبيه في الثلاجة لحد وقت الفطار، وبعد كده قدّميه بارد.

ملحوظة: ممكن تزوّدي كمية المبه والسكر على حسب الطعم اللي تفضّليه.

***************

سلطة على الطريقة التركية

سلطة على الطريقة التركية

سلطة على الطريقة التركية

المقادير:
¼ كوب حمص مسلوق
8 ورقة خس مقطّع قطع صغيرة جدا
¼ كوب زيتون أسود مقطّع حلقات
2 ثمرة طماطم مقطّعة شرائح
2 ثمرة خيار مقطّعة شرائح
3 ملعقة كبيرة زيت زيتون
½ كوب جبنة فيتا
ليمونة
ملح

الطريقة
1- اخلطي الخس مع الخيار و والطماطم والزيتون وقلّبيهم كويس، وبعد كده ضيفي عليهم الحمص وزيت الزيتون والجبنة وقبل التقديم تبّلي السلطة بالملح وعصير الليمون.

***************

شوربة على الطريقة التركية

شوربة على الطريقة التركية

شوربة على الطريقة التركية

المقادير:
¼ كيلو صدور فراخ أو ديك رومي مقطّعة
ملعقة كبيرة صلصة طماطم
3 ملعقة كبيرة أرز مسلوق
4 ثمرة طماطم مفرومة
كوب بقدونس مفروم
2 ملعقة كبيرة زبدة
ملح وفلفل أسود
ملعقة كبيرة دقيق
5 كوب شوربة

الطريقة:
1- شوّحي قطع الفراخ في السمنة لمدة دقيقتين وبعد كده ضيفي عليهم الدقيق وقلّبيهم مع بعض لغاية ما الفراخ والدقيق يبقى لونهم دهبي.

2- بعد كده ضيفي عليهم الطماطم وصلصة الطماطم وقلّبيهم مع بعض على النار لمدة من 3 : 4 دقائق.

3- بعد كده ضيفي عليهم الرز المسلوق وقلّبي الخليط كله، وبعدين ضيفي عليهم الشوربة، وسيبيهم مع بعض على النار لغاية ما الشوربة تغلي، وبعد كده قللي درجة الحرارة وسيبي الشوربة على النار لمدة 10 دقائق، وبعد كده تبّليها بالملح والفلفل واغرفيها في أطباق التقديم وزيّنيها بالقدونس.

***************

الكباب التركي

الكباب التركي

الكباب التركي

المقادير:
كيلو باذنجان
½ كيلو لحمة مفرومة
بصلة متوسطة مفرومة
ثمرة بطاطس صغيرة مقشّرة ومفرومة
حزمة بقدونس مفروم
ملح وفلفل أسود
2 ثمرة طماطم مقطّعة شرائح
2 ثمرة فلفل رومي مقطّعة شرائح
½ كوب صلصة طماطم

الطريقة:
1- اخلطي اللحمة مع البقدونس والبصل  والبطاطس والملح والفلفل، وشكلّيها على هيئة كرات صغيرة، وسيبيها على جنب.

2- اغسلي الباذنجان وقشّريه، وقطّعيه شرائح طويلة ورفيعة وحطّيه في ميه وملح، وبعد كده حمّريه في الزيت لغاية ما لونه يبقى دهبي وبعد كده ارفعيه على مناديل ورقية علشان تتشرّب الزيت.

3- افردي شريحتين من الباذنجان فوق بعض على شكل علامة زائد (+) وحطّي شريحة طماطم في النصف وعليها الكفتة وابدئي اثني عليها الباذنجان من كل الجوانب، لغاية ما تغطّي الكفتة بالكامل والباذنجان ياخد نفس شكل كرات الكفتة.

4- في النهاية اقفلي الباذنجان من عند الأطراف بالعيدان الخشبية، ورصي فيها شريحة طماطم وشريحة فلفل رومي.

5- هاتي الصينية وحطّي فيها نصف كمية صلصة الطماطم، وبعد كده رصّي فيها الكفتة، وعلى الوش حطّي باقي كمية الصلصة وممكن تضيفي كمان جبنة موتزاريلا، ودخّلي الصينية في الفرن لغاية ما الكفتة تستوي، وبعد كده طلّعيها وقدّميها مع رز أبيض.

***************

بودنج الفروالة

بودنج الفروالة

بودنج الفروالة

المقادير:
16 قطعة توست منزوعة الأطراف
½ كيلو فراولة
2 كوب سكر

الطريقة:
1- غلّفي طبق غويط بالتوست من كل الجوانب، وسيبي 4 قطع من التوست لتغطية الوش بعد ما تحطّي الفراولة.
2- حُطّي نصف كمية الفروالة على النار وضيفي عليها السكر لحد ما يدوب تماما والفراولة تنزّبل العصير اللي فيها.

3- بعد كده ضيفي باقي الفراولة علشان تتشرب من العصير.

3- صُبّي الخليط في الطبق اللي غلفتيه بالتوست مع مراعاة إنك تسقي التوست بالعصير اللي نزل من الفراولة وبعدين غطّي الطبق بباقي التوست، وحُطّي حاجة تقيلة فوق الطبق وسيبيه في التلاجة طول الليل.

4- بعد كده طلّعيه من الثلاجة، واقلبيه في طبق التقديم وقطّعيه بالشكل اللي تحبيه.

***************

للسحور.. جبنة بالطماطم

للسحور.. جبنة بالطماطم

للسحور.. جبنة بالطماطم

المقادير:
كوب جبنة
4 ثمرة طماطم
ملح وكمون وفلفل أسود
½ ثمرة بصل مبشورة
6 ملاعق زيت زيتون
عصير ½ ليمونة

الطريقة:
1- قطّعي الطماطم قطع صغيرة وحُطّيها على الجبنة، وبعد كده ضيفي عليهم البصل والتوابل وقلبيهم كويس.

2- ضيفي الليمون وزيت الزيتون للجبنة وقلّبيهم مرة تانية، وقدمي لأسرتك طبق جبنة بالطماطم بطعم مختلف.

وبكده خلصت عزومة النهارده..
مستنيين تجرّبي وتقولي لنا إيه رأيك..
واستنينا بكرة إن شاء الله مع عزومة جديدة..

الكلمات الدليلية :| | | |

مقالات متعلقة