على سفرة النهارده هيكون موجود عصير اللوز وسلطة سيزر مع الجمبري وشوربة الجمبري بالكريمة وجمبري مشوي في الفرن وقوالب الكنافة بالفستق وعلى السحور بنقدملك أومليت بالبصل والأعشاب..
عصير اللوز
المقادير:
2 كوب لوز ني
كوب سكر بودرة
ملعقة صغيرة مية ورد
3 كوب لبن
الطريقة:
1- حطّي اللوز واللبن والسكر مع بعض في حلة على النار، وسيبيهم لغاية ما تحسّي إن اللوز بقى طري.
2- اضربي كل المقادير مع بعض في الخلاط الكهربائي لغاية ما يتجانسوا مع بعض، وبعد كده صُبي العصير في إناء كبير، وحطّيه في الثلاجة علشان يبرد، وبعد كده طلّعيه وحطّي في كل كوب مقدر 3 ملعقة كبيرة من العصير وكمّلي الباقي باللبن وقدّميه مع الثلج.
***************
سلطة سيزر بالجمبري
مقادير تتبيلة الجمبري:
كيلو جمبري متوسط الحجم مقشّر
2 ملعقة كبيرة عصير ليمون
¼ ملعقة صغيرة فلفل أسود
2 ملعقة كبيرة زيت زيتون
½ ملعقة صغيرة بابريكا
ملعقة صغيرة زعتر جاف
ملعقة صغبرة ملح
مقادير السلطة:
ثمرة كابوتشا كبيرة مقطّعة شرائح
¼ كوب جبنة بارميزان أو رومي مبشورة
5 شريحة توست مقطّعة مكعبات صغيرة
2 ملعقة كبيرة عصير ليمون
3 ملعقة كبيرة زيت زيتون
ملعقة كبيرة مستردة
4 فص ثوم مفروم
½ كوب مايونيز
رشة فلفل أسود
¼ كوب ميه
الطريقة:
1- اخلطي كل مقادير تتبيلة الجمبري مع بعض وسيبي الجمبري بالتتبيلة دي لمدة ساعة على الأقل، وبعد كده اشوي الجمبري على الشواية أو على الجريل لغاية ما يبقى لونه ذهبي، بس خدي بالك ما تسيبيهوش لفترة طويلة علشان ما ينشفش.
2- اضربي الثوم مع المايونيز والجبنة وعصير الليمون والمستردة والفلفل الأسود مع في الخلاط لغاية ما يبقى عندك صلصة ناعمة، وممكن تزوّدي شوية ميه لو حسّيتي إن الصوص تقيل، ودخّليها في الثلاجة بعد كده لمدة 30 دقيقة.
3- سخّني 3 ملعقة زيت زيتون في طاسة على نار متوسطة وحمّري فيه مكعبات التوست وقلّبيه لغاية ما لونه يبقى ذهبي، وبعد كده طلّعيها وسيبيها تبرد.
4- رصّي الخس في طبق سلطة واسع وحطّي فوقه الجمبري والتوست وضيفي بعد كده الصلصة فوقهم، وممكن تزينيها بجبنة مبشورة.
***************
شوربة الجمبري بالكريمة
المقادير:
½ كيلو جمبري وسط مغسول ومقشر
ملعقة صغيرة ثوم مفروم
ملعقة صغيرة بهارات
2 ملعقة كبيرة دقيق
2 كوب كريمة لباني
2 ملعقة كبيرة زبدة
3 كوب ماء
بقدونس مفروم (للتزيين)
الطريقة:
1- سيّحي الزبدة في حلة على النار، وبعد كده شوّحي فيها الجمبري، وقلّبيه مرة وبعد كده ضيفي عليه الثوم والبهارات وقلّبيهم مع بعض وسيبيهم على النار لحد ما الجمبري يستوي.
2- ضيفي الدقيق على الجمبري وقلّبيهم مع بعض، وابدئي ضيفي الميه بالتدريج، وبعد خمس دقائق ضيفي الكريمة، مع الاستمرار في التقليب على نار هادئة لمدة 15 دقيقة.
3- بعد كده اغرفي الشوربة في أطباق التقديم وزيّنيها بالبقدونس المفروم وممكن تقدّمي معاها عصير ليمون.
***************
جمبري مشوي في الفرن
المقادير:
1½ كيلو جمبري كبير بقشره
¼ كوب صويا صوص
½ كوب عصير ليمون
½ كوب زيت زيتون
ملعقة صغيرة بابريكا
6 فص ثوم مفروم
ملح وفلفل أسود (حسب الرغبة)
الطريقة:
1- افتحي ظهر الجمبري بالمقص وشيلي كيس الرمل اللي بيكون فيه، واغسليه كويس وشيلي الرأس، بس من غير ما تقشّريه.
2- اخلطي باقي المقادير مع بعض وحطّي الجمبري في الخليط ده وسيبيه في الثلاجة لمدة ساعة.
3- رصّي الجمبري في صينية وممكن لو تحبي حطّي معاه شرائح فلفل حامي وبعدين دخّليه في فرن ساخن على درجة حرارة 200.
4- أول ما الجمبري يحمرّ، اقلبيه على الناحية التانية وسيبيه يكمّل سواه، وبعد كده قدّميه في طبق مزيّن بشرائح الليمون.
***************
قوالب الكنافة بالفستق
المقادير:
½ كيلو كنافة
½ كوب فستق مطحون (أو أي نوع مكسرات)
2 ملعقة صغيرة ماء ورد
كوب سمنة سايحة
عصير ليمونة
كوب قشطة
2 كوب ماء
كوب سكر
الطريقة:
1- لتحضير الشربات، ضيفي الميه مع السكر وحطّيهم في حلة على النار وسيبيهم على نار هادية لغاية ما يغلوّا، وبعد كده ضيفي عليهم عصير الليمون ومية الورد وسيبيهم لغاية ما الشربات يُعقد وبعدين ارفعيه من على النار وسيبيه يبرد.
2- هاتي الكنافة واخلطيها مع مقدار مناسب من الزبدة وبعدين افرديها على ورق ألومنيوم وحطيها في الفرن لغاية ما يتغير لونها شوية وقلبيها كل شوية علشان كلها تبقى لون واحد.
3- بعد كده طلعي الكنافة من الفرن واسقيها بالشربات علشان تبقى طرية وبعدين افركيها لغاية ما تبقي مفرولة.
4- حطّي الكنافة في قوالب الكب كيك واضغطي عليها كويس وبعدين اقلبيها في طبق التقديم، وزيّنيها بالقشطة والفستق المطحون وقدّميها.
***************
للسحور.. أومليت بالبصل والأعشاب
المقادير:
8 بيضات
بصلة خضراء صغيرة مقطّعة مكعبات
¼ كوب كزبرة خضراء مفرمة
ملعقة صغيرة روزماري مفروم
بصلة صغيرة مقطّعة مكعبات
2 ملعقة كبيرة جبنة شيدر
¼ كوب بقدونس مفروم
ملعقة كبيرة زعتر مفروم
ملح وفلفل حسب الرغبة
ملعقة صغيرة زيت زيتون
ملعقة كبيرة قشطة
ملعقة صغيرة زبدة
الطريقة:
1- اخفقي القشطة والبيض مع بعض في طبق لغاية ما البيض يزيد حجمه.
2- اخلطي الأعشاب (الروزماري والكزبرة والزعتر والبقدونس) مع البصل والبصل الأخضر والملح والفلفل في طبق تاني وبعدين حطّى عليهم خليط البيض والقشطة.
3- سخّنى الزبدة وزيت الزيتون في طاسة كبيرة وصبّي الخليط وسيبيه على النار لغاية ما تظهر فقاعات على سطحه.
4- ارفعي الطاسة من على النار، ودخّليها في فرن ساخن علشان يكمّل سواه.
5- طلّعي الأومليت من الفرن، وحطّيه في طبق التقديم، ورشّي على الوش الجبنة الشيدر.
Comments are closed.