انتقد الإعلامي عمرو أديب، ، استعانة الداخلية بـ«المواطنين الشرفاء» للتصدى للصحفيين أثناء انعقاد جمعيتهم العمومية مؤخرًا، قائلًا: «حكاية المواطنين الشرفاء دي مضايقني أوي، بلدي أوي يا نفيسة، محمد بيه بتاع قسم الهرم لازم يطور نفسه، أتطوروا بقى كفاية، دسوا مثلًا ناس وسط الصحفيين، كده يعني، في أساليب تانية جديدة، لكن موضوع الميكروباصات اللي جاية تنزل الناس وبتاع ده شغل قديم، شغل الحزب الوطني بتاع زمان، المواطنين الشرفاء اللي مش بيطبق عليهم قانون التظاهر، يطبق علي أي حد إلا دول، ليه؟ لأنهم شرفاء يا جماعة».
أضاف أديب، خلال تقديمه برنامج «القاهرة اليوم»، عبر قناة «اليوم»، «البلد دي مفيهاش حوار، لا أحزاب ولا شخصيات ولا أي حد إلا الرئيس، أي مشكلة نقول يا ريس»، مشددًا على انزعاجه من زيادة ظاهرة القبض على النشطاء السياسيين، قائلًا: «أنا ابتديت أنزعج من كمية القبض على الناس، البلد دي إحنا كلنا شركاء فيها، أي حد بقى بيتقبض عليه كمان بنلزقله تهمة قلب نظام الحكم، بكل صراحة إحنا فشلنا في التعامل مع الفئة دي من الشعب، هل يمكن تعديل المسار؟ يجب أن لا نتمادى في الأخطاء».
أكد «أديب» أنه «لا يوجد لدينا رأي عام رشيد»، مضيفًا: «الرأي العام المصري بيدافع عن أي حاجة غلط، وأؤكد أن الإعلام ليس صديقًا للنظام، وأنا أتحدث عن الإعلام الخاص والرسمي، إحنا مش بنشتغل عند النظام، بنشتغل عند الشعب، وأظن الكلام ده وضِح للناس كلها الأسبوع اللي فات»، موضحًا أنه «ما زالت شعبية هذا النظام قوية، ولكن السؤال.. هل هي نفس شعبيته من 3 شهور؟».
Comments are closed.