يبدوأن الأمهات لا يشتركن فقط فى حب أولادهن والخوف عليهم وبذل كل ما فى وسعهن لأسعادهم وتمنى الأفضل لهم بل العجيب ان الأمهاتش كلهن لا فرق بين متعلمة وغير متعلمة ،غنية أوفقيرة،عربية أو أجنبية يستخدمن نفس العبارات خاصة التأديبية. ولأن هذه العبارات تكاد ترقى إلى حد المأثورات فقد رأيت أن أستعرضها باللغة العامية كما تقولها ست الحبايب :
– أصحى يالله هتتأخر
غسلت أسنانك؟علقت هدومك؟
ذاكر
العصفورة قالتلى
ماتتكلمش والأكل فى بقك
ما عندكيش حاجة تلبسيها؟ده دولابك مليان
أول ما توصل اتصل بيا عشان أطمن
أنت جاى تنكد على مش كده؟
أنت نور عينيا اللى باشوف بيها
هوه أنا قاعدة على تل فلوس؟
علله أشوفك بتعمل كده تانى
لو قمت من مكانى مش هيحصل كويس
متحطش صباعك فى بقك
ما تسهرش
أنا بأعمل كده عشان مصلحتك
متلزقش فى التلفزيون عنيك هتبوظ
ازاى هتعرف انك مش بتحبها وانت ما دوقتهاش
أنا ما سألتش مين حطها هنا أنا قلت شليها مكانها
أنا ماليش دعوة التانيين بيعملوا ايه أنا ليا دعوة بيك
أنا عمرى ما كلمت مامتى بالطريقة دى
لوما خلصتش طبقك ما فيش حلو
مش هتأكل؟
رتب اوضتك
ناوى أن شاء الله تعمل اللى وراك أمتى؟
هو حد قاللكم انى سواق تاكسى
والنبى ما تزعل نفسك مافيش حاجة تستاهل
بصلى وأنا بأكلمك
أنا ما بلاقيش الفلوس على الأرض
لو كنت حطتها مكانها كنت لقيتها
لما بابا ييجى هأقوله
أنتم هديتى
وطى صوت التلفزيون..الكاسيت…
أنا لما كنت فى سنك…….
هات بوسة لماما
سمعت الكلمة دى فين؟
هتخرج معايا باللبس ده؟
انتم هتجننونى
هو أنا لازم ألف وراك طول النهار ألم فى حاجاتك
هو أنا بأكلم نفسى
لما أسألك سؤال رد على
أنت أطرش ولاحاجة
شوية صابون و مية مش هيموتوك
طول ما أنت عايش فى البيت ده هتعمل زى ما أقولك
زهقان يعنى إيه ؟أنا عمرى ما زهقت فى سنك
عارف لومابطلتش عياط هخليك تعيط بجد
ما تعصبنيش أكثر من كده
ورغم أن أغلب العبارات مجرد أوامر ونواهى وتهديدات إلا انها نابعة من الحب الشديد و حرص الأم على أن يكون أولادها هم الأفضل.
Comments are closed.