بالفيديو.. كل اللي عايزة تعرفيه عن منتجات الكيراتين
إيه أفضل أنواع الكيراتين؟
الكيراتين المُصنّع بدأ ظهوره في البرازيل من حوالي عشر سنين، علشان كده الكيراتين البرازيلي يعتبر هو أفضل الأنواع، يليه الكيراتين الأمريكي، لكن البرازيلي هو اللي بيتصدر في المقدمة لأنه بيحتوي على المادة الخام بتاعة المنتج نفسه.
كيف يتم استخلاص مادة الكيراتين؟
فيه نوعين من الكيراتين: نوع بيتم استخلاصه من نبات معيّن، وفيه نوع تاني بيتم استخلاصه من صوف الغنم، وده بيسمى كيراتين حيواني.
ما هي فوائد العلاج بالكيراتين؟
الكيراتين الصناعي بيكون بديل عن الكيراتين الطبيعي اللي بنفقده، وبالتالي فهو بيغذّي الشعر وبيعالج التقصّف والهيشان، وبيخلي الشعر أطرى ويدّي له نعومة، وبيكون شكله صحي أكتر.
هل الكيراتين بيفرد الشعر زي كريمات الفرد؟
في مصر للأسف ربطوا بين جمال الشعر وفرده، وده غلط، وعلشان كده بنات كتير بتعمل دايما سيشوار وبيبي ليس علشان تعرف تخرج وتروح الشغل، وده طبعا بيجهد الشعر، لكن الكيراتين هو حمام كريم عميق المفعول بيخلّي الشعر نفسه صحي وناعم وبيلمع، لأنه بيتغلغل داخل الشعر لكنه مش فرد 100%.
هل فيه كيراتين له تأثير دائم على الشعر؟
مافيش أي منتج كيراتين خالي من الفورمالين ممكن يستمر في الشعر بشكل دائم، لأن الكيراتين الخالي من الفورمالين بيستمر لفترة من 2 : 6 شهور، وبيكون تأثيره على الشعر إنه بيخلّي الشعر صحي وطري وناعم، وفيه أنواع بيكون فيها نسبة فرد لكن مش فرد بشكل كامل، وده بيناسب أكتر الناس اللي شعرها عادي والتمويجة فيه واسعة مش ضيقة وقريبة من بعضها.
طيب البنات اللي شعرها مجعد تعمل إيه؟
أحدث العلاجات اللي موجودة دلوقتي للشعر المجعد وتكون خالية من الفورمالين بتعتمد على الأحماض الأمينية، واللي بتكون موجودة بنسبة عالية جدا فبتفك كسرة الشعر المجعد، وده بيعمل فرد بنسبة 50%.
أما بالنسبة للعلاج بالكيراتين، فممكن البنت في الحالة دي تعمل جلستين بالكيراتين وهيديكي نتيجة مُرضية، من غير اللجوء للمواد الكيميائية أو الحاجات اللي موجود فيها نسبة فورمالين عالية.
Comments are closed.