في ذكرى رحيل والدها استعادت الفنانة المصرية نشوى مصطفى بعض ذكريات الطفولة ووجهت رسالة حزينة إلى والدها.
نشوى كتبت على صفحتها عبر موقع «فيس بوك»: «زى دلوقتي بالظبط في نفس الوقت ده من زمن يساوى بحسابات البشر كام سنة ربنا قدر لي أنى أتوحد—أيوه هي الكلمة دى بقسوة معناها—ليه سيبتنى ياحبيبى ؟؟ كنت لسه محتاجالك—- لحد دلوقتي محتاجالك—عبد الرحمن ومريم بقوا فى الجامعة وعيلتنا زادت—أنجى أتجوزت احمد وبقى عندنا كارمن—جميلة أوى وشقية ومغلبة أنجى كان نفسي تشوفها وفى رمضان تزود عدد الفوانيس وفى العيد تجيب لها هي كمان لعبة العيد».
الفنانة المصرية أضافت: «لسه فاكرة لما كنت بتوصلنى الامتحانات وتفضل مستنينى لحد مااخلص لسة فاكرة فرحتك وانت بتوصلنى الجامعة اول يوم دراسة—لسه فاكرة لما كنت بتاخدنى نزور سيدنا الحسين وتدعى لى انا واخواتى—لسه فاكرة قعدتنا فى البلكونة وطعم الشاى من ايديك—لسه فاكرة وانت بتصحينا فى سحور رمضان—ضحكتك ودقنك اللي بتشوكنى وانت بتبوسنى لسه فاكرة الدموع اللي ملت عينيك يوم فرحى—- نسيت افرحك—محمد حيتجوز ميادة خلاص الشهر الجاى—عارفة انك حتكون موجود وحاشوفك وانت بتضحك وفرحان—- الحمد لله ياحبيبى اتطمن على حمادة وعلى فكرة وعدنى انه لما ربنا حيرزقه بولد حيسميه مصطفى—ادعى لى يابابا—الله يرحمك ياحبيبى».
Comments are closed.