وصية صباح قبل وفاتها تفاجئ العالم وتفاصيل اللحظات الاخيرة فى حياتها

وصية صباح قبل وفاتها.. “يحطوا دبكة ويرقصوا بدي ياه يوم فرح”

صعق لبنان اليوم والدول العربية والوسط الفني بخبر رحيل الأسطورة الشحرورة. هذا الخبر الأليم الذي أصاب محبي الشحرورة التي أهدت بصوتها الفرح أعلنته الصفحة الرسمية لصباح عبر موقع فيسبوك التي تديرها ابنه أخت الشحرورة كلودا عقل التي كتبت بأن الراحلة فارقت الحياة عند الساعة الثالثة فجراً وكتبت تقول..

يا أحباب الصبوحة..

الصبوحة اليوم راجعه على ضيعتا ع الأرض اللي حبّتا وحبّتا.

الصبوحة اليوم راحت عالسما، عند الرب الكبير.. راحت عند أهلا واخوتا اللي اشتاقتلن كتير.

صباح الحياة، صباح الفرح صباح الابتسامة المشرقة دايما.. صباح الضحكة المرسومة بأصعب الأوقات

بتودعكن وبتقلكن ما تبكوا وما تزعلوا عليي وهيدي وصيتي الكن..

قالتلي قوليلن يحطوا دبكة ويرقصوا، بدي ياه يوم فرح مش يوم حزن.

بدي ياهن دايما فرحانين بوجودي وبرحيلي متل ما كنت دايما فرّحن.

وقالتلي قلكن أنه بتحبكن كتير وإنو ضلوا تذكروها وحبوها دايماً.

يا أحباب الصبوحة..

الصبوحة ما عادت موجودة معنا بجسدا بهاللحظة..

الساعة 3 فجر اليوم طلعت روحا إلى الخالق وهي نايمة.

حتى في رحيلها كانت هنية ومتل النسمة، وما زعجت حدا ولا تعبت حدا.

الصبوحة رحلت بالجسد بس رح تضل موجودة بقلوبنا إلى الأبد.

رح نشتقلك كتير كتير كتير يا حبيبتنا.

يا ريت كان بايدنا نعطيكي كل لحظة من عمرنا ونخليكي معنا أكتر وأكتر.

بس هاي إرادة ربنا..

منحبك صبوحة منحبك للأبد وما رح ننساكي أبداً أبداً.

الله يرحمك يا صبوحة ويغفرلك وتكون نفسك بالسما مع الأبرار والقديسين.

منبقى نوافيكن بكل التفاصيل الخاصة بمراسم وداع الصبوحة هون على هالصفحة .. خليكن معنا ورجاء كلكن ترفعوا الصلوات هلق لراحة نفس الصبوحة .

نشرت كلودا عقل ابنة شقيقة الراحلة صباح، قبل لحظات مراسم وداع الشحرورة عبر حسابها الخاص علي موقع التواصل الاجتماعي “فيس بوك”.

وكتبت فى تدوينة لها عبر “الفيس بوك”: “بفرح كبير وتلبية لرغبة سيدة البهجة والفرح والامل تعلن عائلة الصبوحة فقيدتهم الغالية الشحرورة صباح وبتشكر العائلة كافة وسائل الاعلام من صحافة واذاعات وتليفزيونات ومواقع الكترونية وجميع الاصدقاء والمحبين على العاطفة النبيلة التي غمروا العائلة فيها واحاطت للعائلة منذ لحظة إعلان رحيل الصبوحة”.

وأضافت: “وتطلب العائلة من جميع وسائل الاعلام وجميع الاحبة وتلبية لرغبة ووصية الصبوحة انه ما حدى يحزن وحطوا الاغاني وارقصوا وافرحوا هيك بدا الصبوحة ما بدها حزن.. منعرف انه الطلب هيدا صعب بس لازم ننفذ رغبة الصبوحة ووصيتها.. كل واحد يحط عا صفحته صور واغاني الصبوحة بدون حزن وبكاء هاي رغبة عائلة الصبوحة ورغبة الصبوحة”.

وعن مراسم وداع الصبوحة قالت عقل: “سوف يسجى الجثمان عند الساعة الحادية عشرة صباح الاحد 30 نوفمبر 2014 في كاتدرائية مار جرجس المارونية في وسط بيروت ويحتفل بالصلاة لراحة نفسها في تمام الساعة الثانية من بعض الظهر في مأتم رسمي وشعبي ويوارى جثمانها الثرى في مسقط راسها بدادون”.

وتابعت: “وتستقبل العائلة التعازي يوم الاثنين والثلاثاء 1 و 2 ديسمبر في صالون كاتدرائية ما جرجس المارونية في وسط بيروت من الحادية عشرة الى السادسة مساء.. الله يرحمك يا صبوحة وتكون نفسك بالجنة يارب”.