كل ما يوم الفرح بيقرب بتيجي للعروسة هواجس كتيييير و تهيؤات للكوارث اللي ممكن تحصل في الفرح!!!! ياتري هاطلع جميلة !! الناس هيعجبها الفرح!! الوقت هيكون مظبوط و هوصل في المعاد !! طب لو وقعت بالفستان وانا ماشيه !!!!!!!!!!!!!!!!
و طبيعي جدا ان بوم الفرح بيبقى سبب توتر كبير لكل عروسة..وبتقعد تفكرله وتشيل همه من قبله بشهور.. عشان كده حاولنا نشوف المشاكل اللي بتقابل العروسة ونناقش حلولها.. والمقالة دي كلها عن خبرات شخصية مش مجرد تجميع أراء
هنرقم المشاكل عشان التنظيم مش عشان اهمية او حجم المشكلة..
١- الميكب هيطلع وحش.. طبعا الميكب هو اهم حاجة في شكلك يوم الفرح فلو مش واثقة فيه هتبقى حالتك صعبة جدا وثقتك في نفسك هتقل .. فلازم تعملي بروفه الأول فبل الفرح وتشوفيه وتطمني علي شكلك هيبقى عامل ازاي عشان متنصدميش وانتي خارجة من الكوافير فبل الفرح بساعتين!
ومتنسيش تخدي معاكي ميكب ريموفر احتياطي برضه عشان لو لا قدر الله الميك اب ارتست عك او عمل حاجة مش عاجباكي
وممكن برضه تتففي مع حد شاطر يظبطلك المبك اب بين الجامع او الكنيسة والريسبشن..
2- الفستان هيتوسخ وهيتقطع.. فعلا العروسه بتبقى مش مركزة مع كل حركاتها و تصرفاتها اللارادية ..وفجأة تلاقي فستانها متوسخ او مقطوع !!
أولا خلي مكان التصوير يكون نضيف مش كله اشجار طالعه لان ممكن تشبك في الفستان وتقطعه.. بلاش اماكن ترابيه ..وقبل ما تمشي في الحشيش… اتاكدي انه مش مبلول علشان ميطينش الفستان.. علي قد ما تقدري اختاري مكان التصوير راقي ونضيف..
تاني حاجة فقرة الشربات.. اتففي مع المكان انه يقدم الشربات بشاليموه وان الفقرة دي تخلص بسرعة ومتطولش.. وانتي بتشربي ركزي في الكوباية مش في الكاميرا والناس.. وبرضة لو لأسوا الظروف وحصل أي حاجة خليكي منطلقة واتسمتعي بيومك ابتسامتك وفرحتك هاتغطي على كل حاجة
٤- النور هيقطع.. وده وارد جدا في ايامنا ديي ..فلازم المكان اللي هاتختاريه يكون مجهز ب جينيريتور… ده بقى ضروري اوي دلوقتي..
كمان خلي واحده من صاحباتك تاخدلك مروحة يدوية (فرو ابيض) عشان لا قدر الله ممكن تحتاجيها لاسوا الظروف في الحر
٥- الدنيا هتمطر ا وهتبقى الدنيا سافعة تلج!!! دي فرصتك لفرح متميز …
انطلقي واستمتعي بكل لحظة…وفعلا لو كل الناس بردانة انتي مش هاتبقي حاسسة بحاجة …خلي معاكي في العربية شمسية بيضه احتياطي.. وطبعا لو انتي مش متقبلة فكرة المطر يبقى بلاش أماكن مفتوحة وخلي الفرح في قاعة مغلقه..
٦- الطرحة هاتتزحلق….. اعملي بروفه عشان تتأكدي انها مريحاكي واتحركي جامد وشوفيها ثابته ولا لأ.. خدي دبابس للحجاب وبنس للطرحه احتياطي..و لو اتفكت مش هتبقي كارثة ياما اتفكت من عرايس في الفرح و بيعرفو بثبتوها تاني …
7- اروح الفرح متأخر.. ودي اكتر مشكلة بنقابلها في مجتمعنا وهي ان كل الناس مبتلتزمش بالمواعيد …علشان كدة اعملي حساب ساعتين بدري في كل اتفاقياتك للفرح .. (يعني لو كان الفرح الساعة ٦ – اتفقي علي كل المواعيد كانه ٤) وسيبي لنفسك الساعتين دول و متقلقيش مش هتزهقي فيهم :))
ولو اتاخرتي فعلا دي حاجة طبيعية جدا ومفيش فرح بيبتدي في معاده.. مش اخر الدنيا …واستمتعي بالفرح
8- الفرح هيكون ممل والناس هتزهق: اتفقوا انتو الاتنين على برنامج معين بالوقت ويستحسن انكوا تجهزوا انتو حاجات تعرضوها (ممكن تصوروا فيديو ليكم او تعرضوا صوركم … مفيش مانع تعملوا فقرة صغيرة شكر لوالديكم …ابتكرو انتوا) …متتكليش على ان حد ممكن يعملك مفاجأت يوم فرحك ..املي البرنامج و لو في أي زيادة من أي حد مش هتخسر
٩- الاعطال الفنية……. لو ناويه تعرضي حاجات في الفرح لاازززم تخلي حد بيفهم في الصوت والفيديو يروح المكان قبل الفرح ويشوف الوصلات اللي هتحتاجوها.. ويتطمن ان كل حاجة شغاله تمام …لان الاعطال الفنيه دي هي اللي بتفصل الفرح و تخلي الناس تشعر بالملل
١٠- الجزمة تكون متعبه ومعرفش أتحرك.. قيسي الجزمة وامشي بيها قبل الفرح علشان تتاكدي انها مريحة .. وفي ناس بتعمل حسابها تجيب جزمة الفرح اوسع نمرة من الطبيعي بتاعها ومفيش مانع انك تخلي معاكي باليرينا او كوتشي فرح احتياطي.. بس برضه عن تجربة حتى لو تعبتك شويه .. الفرحة بتنسيكي التعب
وافتكري دايما انك مش اول واحدة تعدي في التجربة دي و في ناس قبلك كتير كانو خايفين زيك و فرحهم طلع على احسن ما يكون …. اطلبي من اصحابك يكونوا معاكي اكتر وقت ممكن قبل الفرح في التجهيزات و في الفرح كمان ..هيفرقوا معاكي كتير نفسيا ….
وطبعا اولا و اخيرا ادعي لفرحك وكل المشاكل اللي خايفة وقلقانة منها
Comments are closed.