حركات تأكدلك ان دماغه فعلاً مشغوله بس مش فيكي

لو مال للامام .. سقط كتفه و بص لفوق

خبراء علم لغه الجسد قالوا ان لو ادم اخد الوضعيه دى يبقى هيعترف بحاجه شغلاه .. مش شرط تكون حاجه سيئه او خبر صعب .. ممكن يكون موضوع عادى بس كبير بالنسبه له

اتعاملى بذكاء

قوليله مالك او ايه اللى شاغلك و اسكتى .. متحاوليش تزنى او تطلعى المعلومه بالعافيه لانك كده حتى لو قالك مش هيبقى مرتاح .. اديله فرصه وهو هيكلم و يحكيلك

2.اتأكدى

لو حط ايديه تحته وهو قاعد / شبك ايديه ف بعض / او حطها فى جيبه

لو عمل كده ( وهو مش بردان) يبقى بيحاول يسيطر على كلامه ..دى من اهم دلالات جسديه انه مش مطمن و بيحاول يطلع الكلام بطريقه ترضيكى

اتعاملى بذكاء

قوليله قد ايه انتى بتثقى فيه .. او اى كلام يطمنه اكتر ..

نصيحه : حاولى تبقى فى وضعيه مريحه .. يعنى افردى دراعك على ضهر الكرسى .. كل ما يحس انك مرتاحه اكتر .. هيطمن و يكلم بصراحه اكتر

3.اتأكدى

لو قابض ايده و عينيه مش ثابته على حاجه و بقه بيتحرك كتير (سنانه , شفايفه , لسانه ) … يبقى هو  فى حاجه

معصباه جداً و شغلاله دماغه

اتعاملى بذكاء

الاول اتأكدى هو مضايق منك انتى ولا من حد تانى ..

افضلى بصه فى عينيه فتره..غصب عنه عينه هتيجى فى عينيك و هتعرفى من بصته ليكى فى الثانيه دى .. لو مضايق منك انتى خليكى صريحه و قوليله زعلان منى ليه .. علامه على انك مهتمه و كمان هتطمنيه

لو حسيتى ان مش بسببك فكريه قد ايه مريح انك تفضفض مع حد .. و احكيله على حاجه حصلتلك قريب مضيقاكى ..

هتخدى انتى الخطوه الاولى وهو هيجى وراكى

4.اتأكدى

لو بيلعب فى شعره , فى هدومه , ساعته , ورقه قدامه , علبه سجايره …. كل دى علامات انه متوتر .. كل ما ايقاع الحركه يسرع .. يبقى التوتر ازيد

اتعاملى بذكاء

اشغليه فى حاجه بيحبها .. ماتش او فيلم او خروجه .. هيهدى شويه و هينسى و اول لما يفتكر الموضوع تانى هتكونى اول واحده يحكلها

5.اتأكدى

لو ايده قريبه من وشه .. بيحك ودنه .. انفه .. او بطريقه غير مباشره بيغطى شفايفه .. اقلقي .. لان دى من اهم علامات انه مخبى حاجه عليكى و بيحاول يكتمها .. لما الواحد بيكدب .. الدم بيكتر فى منطقه المخ و الوش .. و بيسخن المناطق ديه

علامات اخرى

نبره صوته يا هتعلى يا هتقل .. على حسب الموقف ..

كمان هتلاقيه بيبص لتحت ناحيه اليمين

اتعاملى بذكاء

ملهاش حل تانى غير انك تكونى واضحه و صريحه ..بس بطريقه شيك عشان ميجبش نتيجه عكسيه .. لو متكلمش يبقى استنى و حاولى تركزى معاه و تعرفى بطريقتك انتى

6.اتأكدى

لو بيحاول يتفاداكى بعينيه … و جسمه مش مواجهك تماماً ..

مش شرط يبقى ضهره ليكى .. ممكن تبقى حركه بسيطه ..

زى مثلاً لو ماشيين فى الشارع و سبقك بخطوة او قاعدين جنب بعض بس كتفه قدام جسمك بشويه ( مش على نفس مستوى كتفك) ده معناه انه فقد الاهتمام بيكى

اتعاملى بذكاء

هنا بالذات انتى لازم تعتمدى على نفسك … لان الحركات دى مش مؤشر حتمى انه زهق .. بس لو حسيتى بالحركات دى بتتكرر .. ركزى فى علاقتكوا اوى .. وقتكوا مع بعض .. وقته لوحده .. علاقتكوا فى اوضه النوم … لو الحاجات دى متغيرتش يبقى ممكن تكون فتره زهق بسيطه و هتعدى او

هو طبيعته كده ..

اخيراً : زله لسان

– لو معظم كلامه بقى حلفان و صدقينى و بجد .. يبقى اوعى تصدقى

-لو بيجاوب على الاسئله باسئله .. يبقى بيماطل عشان يعرف يجاوب

-لو انكر حاجه مره واحده بمليون طريقه يبقى بيحور مثلاً “لاء لاء استحاله مش ممكن اكيد لاء ….”  لانه لو صادق هينكر ببساطه لانه واثق فى نفسه

اهم حاجه :

المؤشرات دى كلها مش شرط تكون كارثيه ميه فى الميه

لو خدتى بالك من حاجه منها .. حاولى تتأكدى اكتر و اكتر قبل ما تاخدى اى رد فعل